Egypt Skateboarding Hub Since 2005

الارادة و الطموح

eradaWTmouh

الارادة هى اللى بتمشى الواحد فى كل حاجة، هى اللى بتخليه يمشى الطاقة الايجابية كل يوم الصبح من راسه لحد لاموأخذة مؤخرته عشان يروح مدرسته و شغله او حتى عشان يعمل اى حاجة، الارادة بتخلى الواحد يقوم يعمل كوباية القهوة و يقف فى البلكونة يتفرج على خلق الله و هو رايح و هو جاى، الارادة بتخليه يدور على فردتين شراب زى بعض فى وسط الغسيل المتلغبط، الارادة هى اللى بتخليك تعدى تزعق شوية فى البواب..اه ماهو خلاص بقى روتين.

متستهونش بنفسك حتى لو كنت اضعف واحد فى صحابك او عيلتك او حتى بلدك..حيجى عليك يوم تتمنى انك عمرك ما فقدت الامل، عشان الارادة مبتجيش من نفسها، الارادة بتوجها انت فى الحاجة اللى انت عايزها، محدش يقولى قوة روحية و شغل الصينيين دة ، انا بتكلم بجد..الارادة هى اللى خلت كل واحد متفوق او ناجح فى مكانه دلوقتى، متيأسش، ركز، فكر، ابدع.

اكبر دليل على ان فى ناس عندها ارادة ان معظم الناس الناجحة و صحاب الشركات و المصانع اللى تقريبا ماسكة الدنيا كلها كانوا فشلة فى حياتهم قبل ما تجيلهم الارادة و الفكر و الابداع.

الخلاصة..انك لو عايز تنجح او تعمل حاجة يبقى لازم يكون عندك ارادة و طموح، و لو عايز تفشل يبقى خليك زى ما انت و متفكرش و متحاولش تساعد نفسك.

بقلم: علي مجدي
رسم: زياد أشرف