Egypt's Skateboarding Hub Since 2005

المدرسة و استقلالك

schoolFactory-ziadAshraf

اول يوم فى المدرسة مش بيبقى ليه علاقة بالدراسة اصلا,بيبقى اليوم اللى بيتجمع فيه اوسخ شلة فى الدفعة..ايوة بتكلم عن الشلة بتاعتى,فى اول يوم الواحد بيبتدى يفكر فى المقالب و الفقرات اللى حايعملها فى المدرسين,و العيال الدحيحة اللى بيخلصوا المنهج قبل المدرسة ب اسبوع,من اوسخ حاجة فى الرجوع للمدرسة وشوش المدرسين و هما فرحانين فينا عشان راجعين السجن تانى,

اول يوم فى المدرسة بيبقى اليوم اللى كل واحد فى المدرسة بيتمنظر فيه على التانى بالحاجات اللى عملها فى الصيف,و بالموبايلات اللى جابها,اول يوم فى المدرسة بييجى كل مشرف و مدرس يقول ان شكلى مش عاجبه و شعرى طويل و المظهر العام بتاع المدرسة بيضر من شكلى,اول يوم فى المدرسة بيبقى اليوم اللى كل مدرس بيتنك على الطلبة فيه و يعد يقولهم انا معايا شهادات و ماجستير و يشكر فى نفسه,و فى الاخر بيتهزأ مننا.

المدرسة بالنسبالى مش اكتر من كام مدرس بارد على كام امن اهبل على كام مشرف مش طايقنى,بس من غير المدرسة مكنتش قابلت ناس مهمة فى حياتى و مكنتش اتعلمت حاجات فادتنى,منها الكتابة.

المدرسة بردو سجن بالنسبة لينا,الشرب باذن و الاكل باذن..يعنى ازاى يعلمونا الحرية و الانسانية و مش من حقنا نشرب الا على مزاج المدرس؟,ازاى يعلمونا الديمقراطية و ادب الحوار و المدرس مبيرضاش يسمعنا و لو احنا عملنا كدة يتقال علينا مش محترمين و عيال سافلة؟,ازاى المدرسة يجبروك تحلق زيك زى زمايلك و يخلونا كلنا شبه بعض و فى نفس الوقت يبقوا
عايزين كل واحد بمظهر و شخصية مستقلة؟,خليك مستقل,متخليهمش يفرضوا عليك سيطرتهم,خليك زيى

بقلم:على مجدى